第502期的選擇月刊的主題 – 30款熱門香薰油大測試 全部驗出不同皮膚致敏物質！ （英文版）
呢兩日收到各位朋友們的message， 好耐都無咁熱鬧呀！
大家最多係關心『成日標榜全天然後香薰油”竟然”有致敏物質? 』
終於成功帶起一個收埋好耐而應該好好討論的題目。
首先， 唔好只睇其他傳媒的報導， 買返本第502期的選擇月刊由頭到尾睇一次消委會講乜先， 中文版好易睇，網上都有英文版，IFA 都share 埋啦，唔好偷懶。 睇唔明或想再討論就揾我啦，慢慢解你聽香薰角度同消委會角度有乜分別。
其實成個報告寫得好中立， 中間出現好多權威來用唔同角度講解，包括醫學會、香港中毒諮詢中心、香港專業教育學院應用科學系、香港醫院藥劑師學會、香港衛生處。 而化驗標準都有包括世界衛生組織、IFRA (國際香精香料協會 International Fragrance Association)、中國國家推薦日用香精標準、歐盟化妝品規例。。。 當然呢D角度，無一個係由專業香薰治療師出發， 呢個係其中一個不足， 難怪一眾治療師都忍唔住出聲。
呢兩日唔少香薰治療/香薰品牌都有相繼出post 講解整篇報導的手法，特別係測試過程，化學成份含量等等。 寫報告的朋友唔係香薰治療師， 出發點當然唔係專業期刊咁專業，不過唔少重點都係大眾應該要知道的（俾返個讚消委會），就係我成日都講的：
- 香薰油唔係玩具， 唔可以太隨意隨心隨量使用。 用係自己身體出事的都係自己辛苦， 但如果用落家人身體， 出事就係家人啦。
- 一定要用稀釋，唔好直接使用100% 香薰油係身體上，雖然唔少書唔少人都話薰衣草同茶樹可以直接使用， 但使用次數，使用劑量呢？ 呢D都係要小心考慮的環節。
- 無專業醫護人員指導下，唔可以內服。 要知道香薰油的濃度之高，係可以令你內臟受損，仲會加重身體肝臟的解毒負擔。
- 唔同人的使用禁忌。 例如嬰兒、小朋友、男人、女人、孕婦、老人家等等，各自有唔同的情況要注意。
- 有乜問題，唔好自己估估下，諮詢你身邊的香薰治療師，即係我呀喂。
- 唔好只信口耳相傳，真係要用香薰油就買D書睇下，睇多D知多D試多D，出事機會相對減少。 想知邊本書入門好，PM我啦，係呀，又係揾我呀。
最後， 長氣都要講埋， 作為一個香薰治療師，英瑞德法日乜都好， 將正確的資訊帶俾身邊的人，係一件好緊要的事。 係咁易用又唔會出事，大家唔使咁辛苦去讀去考去實戰啦。 各位治療師共勉之。。。
